இருட்டறை உதவியாளர் காலிப் பணியிடம்: உத்தேசப் பதிவுமூப்பு விவரம் வெளியீடு

இருட்டறை உதவியாளர் காலிப் பணிடத்துக்கு, வெளியிடப்பட்டுள்ள உத்தேசப் பதிவுமூப்பு விவரங்களைச் சரிபார்த்துக் கொள்ளலாம் என  அறிவிக்கப்பட்டுள்ளது.

 நாமக்கல் மாவட்ட ஆட்சியர் வி.தட்சிணாமூர்த்தி வெளியிட்ட செய்திக்குறிப்பு:

 மருத்துவப் பணியாளர் தேர்வு வாரியத்தால் 223 இருட்டறை உதவியாளர் காலிப் பணியிடம் அறிவிக்கப்பட்டுள்ளது. அரசு அங்கீகாரம் பெற்ற நிறுவனத்தில் டிஆர்ஏ, சிஆர்ஏ கல்வித்தகுதி பெற்றிருக்க வேண்டும். இந்தக் காலிப் பணியிடத்துக்கு வரும் ஜூலை 1-ஆம் தேதி அன்று வயது வரம்பு, எஸ்சி, எஸ்சிஏ, எஸ்டி பிரிவினருக்கு 35 வயதும், பிசி,  பிசிஎம், எம்பிசி வகுப்பினருக்கு 32 வயதும், இதர வகுப்பினருக்கு 30 வயதும் இருக்க வேண்டும்.

 இதற்கான பட்டியல் தயாரிக்கும் பணி சென்னை மாவட்ட வேலைவாய்ப்பு, பயிற்சித் துறையில் நடந்து வருகிறது. பரிந்துரைக்கப்படும் பதிவுதாரர்களின் உத்தேசப் பதிவு மூப்பு விவரங்கள், தற்காலிக பெயர் பட்டியல் இணையதளத்தில் வெளியிடப்பட்டுள்ளது.  பரிந்துரைக்கப்படும் இறுதிப் பட்டியல் பின்னர் அறிவிக்கப்படும்.

 மேற்கண்ட கல்வித் தகுதியை நாமக்கல் மாவட்ட வேலைவாய்ப்பு அலுவலகத்தில் பதிவு செய்துள்ள பதிவுதாரர்கள் தங்களது பதிவு விவரங்களைச் சரிபார்த்து கொள்ளலாம். பதிவு மூப்புக்குள் விடுபாடு அல்லது திருத்தம் இருந்தால் வரும் மே 11-ஆம் தேதிக்குள் நாமக்கல் மாவட்ட வேலைவாய்ப்பு அலுவலகத்தை தொடர்பு கொள்ளலாம் எனத் தெரிவிக்கப்பட்டுள்ளது.